ТЫДЗЕНЬ БЕЛАРУСКАЙ МОВЫ І ЛІТАРАТУРЫ, ГІСТОРЫІ І ГРАМАДАЗНАЎСТВА
З 25 лістапада па 30 лістапада згодна з планам вучэбна-метадычных фарміраванняў гімназіі прайшоў Тыдзень беларускай мовы і літаратуры, гісторыі і грамадазнаўства, мастацтва, які быў накіраваны на выхаванне нацыянальнай самасвядомасці, патрыятызму, высокіх маральных якасцей вучняў. На працягу Тыдня гімназісты прымалі ўдзел ва ўсіх мерапрыемствах: гульнях, квэстах, інтэрнэт-конкурсах, інфармацыйнай гадзіне “20 фактаў пра Беларусь”.
Традыцыйна распачаўся тыдзень з гульні “Дакраніся да вытокаў”, якая прайшла ў фае гімназіі. Загадзя падрыхтаваны актыў вучняў, знаўцаў роднай мовы і гісторыі беларускага краю, прапаноўваў усім удзельнікам свята разгадаць загадкі, патлумачыць словы і фразеалагізмы, успомніць прыказкі.
Вучні ІХ-ХІ класаў прынялі удзел у абласным конкурсе сачыненняў “Вайна і вера: гісторыя салдацкіх лёсаў”, дзе сталі пераможцамі, гульні-конкурсе “Горад над Сожам”. У рамках правядзення Тыдня, прайшлі мерапрыемствы, прысвечаныя Дню вызвалення Гомеля ад нямецка-фашысцкіх захопнікаў: інтэрактыўная гульня “Загадкі гісторыі”, класныя гадзіны “Паклонімся героям-землякам”, урок памяці для вучняў VІІ-VІІІ класаў “Ніхто не забыты, нішто не забыта”, віншаванне ветэранаў Вялікай Айчыннай вайны.
Урок у музеі на тэму “Генацыд беларускага народа ў гады Вялікай Айчыннай вайны”, у якім прынялі ўдзел вучні 9 “В” класа, не пакінуў абыякавымі ніводнага з юных грамадзян нашай радзімы.
Вучні V класаў сталі ўдзельнікамі экскурсіі “Акно ў мінулае”, якая была праведзена групай валанцёраў-краязнаўцаў у этнаграфічным кутку гімназіі. Тут юныя гімназісты пачулі шмат цікавага пра жыццё продкаў, убачылі прадметы хатняга ўжытку, якімі карысталіся раней. Непаўторнасць і своеасаблівасць этнаграфічнага кутка захапіла дзяцей. Было шмат пытанняў, а колькі жадання дакрануцца да ўсяго, а лепш – патрымаць! Менавіта такія экскурсіі выклікаюць цікавасць у вучняў да пазнання сваёй гісторыі. Не засталіся па-за ўвагай і маленькія навучэнцы гімназіі, для іх вучнямі 9 “В” класа быў праведзены інформ-дайджэст “Ці ведаеце вы, што…”.
Тыдзень беларускай мовы і літаратуры, гісторыі і грамадазнаўства, мастацтва прайшоў цікава, карысна і запамінальна. Гімназісты атрымалі многа новай, цікавай і пазнавальнай інфармацыі.
